शिक्षक लाइसेन्सको नतिजा खस्किँदो अवस्थामा, हासम्मको नतिजामा १५ प्रतिशत मात्रै उत्तीर्ण !

 

शिक्षक सेवा आयोगले गत असोजमा लिएको शिक्षक अध्यापन अनुमति पत्र (लाइसेन्स) को हालसम्म १२ वटा विषयको परीक्षाफल सार्वजनिक गरिसकेको छ । तर नतिजा भने, सोचेको जस्तो आउन सकिरहेको छैन् ।

आयोगले गत हप्ताको मंगलबार साझदेखि लाइसेन्सको परीक्षाफल प्रकाशन शुरू गरेको हो । आयोगले हालसम्म माध्यामिक तहको १२ वटा विषयको नतिजा सार्वजनिक गरिसकेको छ । उक्त १२ वटा विषयको नतिजालाई हेर्दा शिक्षक लाइसेन्सको नतिजा दिनानुदिन खस्किदै गएको अनुमान गर्न सकिन्छ । आयोगले ईलेक्ट्रिकल इञ्जिनीयरिङ, सिभिल इञ्जिनीयरिङ, पशु विज्ञान, बाली विज्ञान, कानून, कम्प्युटर ईञ्जिनीयरिङ, कम्प्युटर विज्ञान, कार्यालय संञ्चालन तथा लेखा, विज्ञान, नेपाली, गणित र सामाजिक विषयको नतिजा सार्वजनिक गरिसकेको छ ।

आयोगले माध्यामिक तहको शिक्षक लाइसेनसको परिक्षाको नतिजा सार्वजनि गर्नेक्रम अन्तिम चरणमा पुगेको जनाएको छ । अब सम्भवत अनिवार्य अंग्रेजी विषयको नतिजामात्र आउन बाँकी छ । न्यूनतम ५० अंक प्राप्त गर्ने उम्मेद्वारहरू उत्तीर्ण हुने व्यवस्था अनुसार नतिजा सार्वजनिक गरिएको हो । हालसम्मको नतिजाअनुसार ईलेक्ट्रिकल इञ्जिनीयरिङका लागि ९१ परीक्षार्थी सहभागी थिए । जसमध्ये ४३ जना पास भएका छन् । की उल्लेख नगर्दा पाँच जना परीक्षार्थीको वस्तुगततर्फको उत्तरपुस्तिका रद्द गरिएको छ । त्यस्तै सिभिल ईञ्जिनीयरिङका लागि २५८ जना परीक्षामा सहभागी भएका थिए । तीमध्ये ४९ जना मात्र पास भएका छन् । चार जनाको परीक्षा रद्द गरिएको आयोगले जनाएको छ ।

पशु विज्ञानका लागि परीक्षामा ४३ जना सहभागी भएकोमा २९ जना पास भएका छन् । त्यस्तै बाली विज्ञानका लागि ३८० जना परीक्षार्थी थिए । जसमा २४९ जना पास भएका छन्, भने १५ जनाको परीक्षा रद्द गरिएको छ । कानूनमा ४४ जना परीक्षामा सहभागी भएकोमा ३५ जना, कम्प्युटर ईञ्जिनीयरिङका लागि परीक्षामा १७९ जना सहभागी भएकोमा ६० जना पास र तीन जनाको परीक्षा रद्द गरिएको छ । यस्तै, कम्प्युटर विज्ञानको परीक्षामा ६५५ जना सहभागी भएकोमा ३४८ जना पास भएका छन् । ३२ जनाको परीक्षा रद्द गरिएको छ । यस्तै कार्यालय संञ्चालन तथा लेखाका लागी ३९ सय २७ जना सहभागि भएकोमा ७ सय ७९ जना मात्रै उत्तीर्ण भएका छन् । एक सय ५६ जनाको परीक्षा रद्द गरिएको छ । यसैगरि शुक्रबार साझ प्रकाशित विज्ञान विषयमा ६ हजार ८ सय ८३ जना सहभागि भएकामा जम्मा १२ सय ९५ जना परिक्षार्थी मात्रै उत्तीर्ण भएका छन्, भने एक सय ८८ जनाको कि उल्लेख नगरेकाले परिक्षा रद्द गरिएको छ ।

यसैगरी नेपाली विषमा १६ हजार ४७ जनाले परिक्षा दिएकोमा २७ सय ३८ जनामात्रै उत्तीर्ण भएका छन् । जसमा ६ सय ५८ जनाले कि उल्लेख नगरेकाले परिक्षा रद्द गरिएको छ । यसैगरी समाजिक विषयमा १० हजार ७ सय ६१ जनाले परीक्षा दिएकोमा ७ सय ९ जनामात्रै उत्तीर्ण भएका छन्, भने, ४ सय ५८ जनाले कि उल्लेख नगरेको र ५ जनाको परीक्षा नै रद्द गरिएको आयोगले जनाएको छ । गणितमा ५ हजार एक सय २५ जना सहभागि भएकोमा ४ सय ४२ जनामात्रै परिक्षमा उत्तीर्ण भएका छन् भने, एक सय ३९ जनाले कि उल्लेख नगरेको भेटिएको छ । यस्तै २ जनाको परीक्षा नै रद्द गरिएको छ ।

यी १२ वटा विषयमा ४४ हजार ३ सय २२ जनाले परीक्षा दिएका थिए । जसमा ६ हजार ७ सय ७९ जना मात्रै उत्तीर्ण भएका छन् । यो १२ वटा विषको नतिजा हेर्दा समग्रमा लाइसेन्स परिक्षामा १५ प्रतिशत परिक्षार्थीहरु मात्रै उत्तीर्ण भएका छन् । पास भएकाहरूले सम्बन्धित प्रदेशस्थित शिक्षा विकास निर्देशनालयमार्फत अध्यापन अनुपति पत्र प्राप्त गर्नेछन् ।

शिक्षक लाइसेन्सको माध्यामिक तहको नतिजा हेर्दा परीक्षार्थीको अवस्था निकै कमजोर देखिएको छ । वस्तुगततर्फ राम्रै देखिए पनि लिखितमा एकदम कमजोर रहेको आयोग स्रोतको भनाइ रहेको छ । नतिजा आउन अझै केहि विषयको बाँकी नै रहेकाले अहिले नै सबै विषयमा परिक्षार्थीको अवस्था कमजोर देखियो भनेर भन्न सकिदैन् । तर माध्यामिक तहको नतिजा प्रकाशनको अन्तिम चरणमा पुग्न लाग्दा नतिजा भने चाहेको जस्तो आउन सकिरहेको छैन् ।

नतिजाअनुसार परिक्षार्थीको अवस्था कमजोर रहेको हो या सम्बसन्धित क्षेत्रको कमजोरी हो त्यो सबै विषय र तहको नतिजा आइसकेपछि समिक्षाको विषय बन्ने नै छ । तर, सम्रगमा हालसम्म नतिजा प्रकाशन भएका विषयको अवस्था हेर्दा यो पटक भने, नतिजाको प्रतिशत खस्किदै गएको देखिन्छ ।